पिंपरी-चिंचवडमधील मोशी कचरा डेपो परिसरात इमारत कोसळल्यानंतर बचावकार्याला युद्धपातळीवर वेग देण्यात आला आहे. दुर्घटनेनंतर परिसरात तातडीने आपत्कालीन यंत्रणा दाखल झाली असून अडकलेल्यांना सुखरूप बाहेर काढण्यावर भर देण्यात येत आहे.
एनडीआरएफ, भारतीय लष्कर आणि अग्निशमन दलाच्या पथकांकडून समन्वयाने शोधमोहीम राबवली जात आहे. धोकादायक अवशेष हटवण्यासाठी हायड्रोलिक यंत्रांचा वापर केला जात असून, बचावकार्य अधिक सुरक्षित आणि जलद करण्याचा प्रयत्न सुरू आहे.
घटनास्थळी तणावपूर्ण वातावरण असून नातेवाईकांची मोठी गर्दी झाली आहे. महापालिका प्रशासनाकडून नातेवाईकांना धीर देण्यात येत असून, बचावकार्यातील प्रत्येक हालचालीवर अधिकाऱ्यांकडून बारकाईने लक्ष ठेवले जात आहे.
या दुर्घटनेमुळे मोशीतील कचरा प्रकल्पाच्या सुरक्षिततेबाबत गंभीर प्रश्न उपस्थित झाले आहेत. कोसळलेली इमारत अवघ्या सहा महिन्यांपूर्वीच सुरू झाल्याची बाब समोर आल्याने प्रकल्प नियोजन, बांधकाम आणि देखभालीबाबत नव्याने चर्चा सुरू झाली आहे.